Сар: 10 сар 2022

Бизнесийн үйл ажиллагааны аль ч түвшинд аливаа зохисгүй үйлдлийн талаар санаа зоволтгүй мэдээлэх боломжийг өөрийн ажилчдадаа бид олгодог. Энэ хүрээнд хөндөгдсөн бүхий л асуудлыг хүлээн авч, зохих ёсоор шийдвэрлэнэ. Аливаа асуудлын талаарх мэдээллийг дээд түвшний албан тушаалтан менежерт дамжуулан мэдээлэх үүрэгтэй. Хэрэв боломжгүй гэж үзвэл компанийн “нууцын зэрэглэлтэй тайлан”-д оруулж мэдээлнэ.

Бид Монгол Улсын холбогдох хууль тогтоомжийн хүрээнд ажиллаж, бизнесийн бүхий л харилцаандаа хууль дээдлэх ёсыг баримталдаг. Аливаа хууль тогтоомж, стандарт, бодлогыг дагаж мөрдөөгүй бол сахилгын шийтгэл ногдуулах журмыг хэрэгжүүлдэг. 

Аливаа хүний хувийн ашиг сонирхол түүний бодитой шийдвэр гаргах чадварт нь нөлөөлснөөр ашиг сонирхлын зөрчил үүсдэг. Тухайлбал: 

• Өрсөлдөгч, үйлчлүүлэгч, нийлүүлэгчидтэй бизнесийн үйл ажиллагаанаас өөр харилцаа холбоотой байх;
• Гэр бүл, ойрын хамаатан садантай хамт ажиллах, ялангуяа төрийн алба хаагч;
• Өөр байгууллагын ТУЗ–ийн гишүүнээр ажиллах зэрэг нь ашиг сонирхлын зөрчил үүсэж болох арга зам юм. 

Хувь хүнийхээ хувьд хэн ч улс төрийн үйл ажиллагаанд оролцож, хандив өгөх эрхтэй. Харин ингэхдээ эл үйлдлээ компанийн бус хувийн улс төрийн үзэл баримтлал, үйл ажиллагаа гэдгээ тодорхой байлгах хэрэгтэй юм. Үүнд;

• Улс төрийн аливаа нэр дэвшигч, намыг дэмжихдээ компанийн төсөв, нөөцийг ашиглахгүй байх;
• Лоббитой холбоотой ямар нэгэн үйл ажиллагаа явуулахын тулд зөвшөөрөл авах.

Бизнесийн харилцааны энгийн нэг хэсэг болох аливаа бэлэг, урамшууллыг зохистой хэмжээнд хүлээж авах, өгөх явдлыг бид дэмждэг. Харин зохисгүй хэмжээнд буюу хэт их /том бэлэг, урамшуулал хүлээн авах, өгөхийг хориглодог. Бэлэг, урамшууллаар дамжуулан ямар нэгэн нөлөөнд автах болон нөлөөлөхөөр завдахгүй байх ёстой. Мөн бид тендер шалгаруулалтын үеэр ямар нэгэн бэлэг урамшуулал өгөх ба хүлээн авахыг зөвшөөрдөггүй дүрэмтэй. 

Бид хээл хахууль, авлигыг үл тэвчих байр суурийг баримталж, авлигын эсрэг хууль тогтоомжийг дагаж мөрддөг. Бид авлигатай тэмцэх үр дүнтэй тогтолцоог хэрэгжүүлэн ажиллахыг зорьж байгаа бөгөөд бизнесийн түншүүдээсээ бидний энэхүү амлалтыг дэмжиж ажиллахыг ямагт уриалдаг.

Мөнгө угаах гэмт хэрэг гэдэг нь хууль бус хөрөнгийг нуун дарагдуулах эсхүл хууль ёсны мэт харагдуулах үйл явц юм. Хууль ёсны хөрөнгийг ашиглан гэмт хэрэг, терроризмыг дэмжих үйл явц нь мөнгө угаах гэмт хэрэгт мөн хамаардаг. Түншүүд болон ханган нийлүүлэгчидтэй хамтран ажиллахад шаардлагатай шалгалт, хяналтын стандартыг дагаж, хөрөнгийн эх үүсвэрийг нягтлах замаар ямар хувь хүн, байгууллагатай хамтран бизнес хийж байгаагаа үргэлж хянаж байх нь чухал юм.

Манай компани дарамт, хүчирхийллийг тэвчдэггүй хамт олон бөгөөд компани дээр энэ төрлийн нөхцөл байдал үүсэхээс урьдчилан сэргийлж, хариуцлагатай ажиллахыг чухалчилдаг. Бусдыг дарамталж, аливаа төрлийн хүчирхийлэл үйлдсэн бол албан тушаал үл харгалзан сахилгын болон хуулийн дагуу арга хэмжээ авах тухай компанийн дотоод журамд заасан байдаг. Бид бие биедээ хүндэтгэлтэй хандаж, шударга бус үйлдлийг эсэргүүцэж ажилладаг.

Байгаль орчин, нийгэм, засаглалын (ESG) стандартыг тууштай баримтлах нь бидний бизнесийн стратеги болон компанийн үнэт зүйлстэй нийцэж, бизнесийн итгэл үнэмшлийг сайжруулна гэдэгт итгэдэг. Бид компанийн ажилтнууддаа хөгжих боломжтой, хүртээмжтэй орчныг бүрдүүлэн ажиллахыг зорьж байна. Ажилтнуудынхаа эрүүл мэнд, аюулгүй байдлыг хамгийн чухал гэж үздэг тул ESG–н стандартыг дагаж мөрдөх нь зүй ёсны хэрэг юм. Бид нүүрс хүчлийн хий бага ялгаруулдаг дэд бүтцийг хөгжүүлэх замаар уур амьсгалын өөрчлөлттэй тэмцэж ногоон эдийн засгийг хөгжүүлэхэд өөрсдийн хувь нэмрээ оруулахыг эрмэлзэж байна.